Eph 2 | BOJ | STEP | Nami niŋgi une yoqnsib laqneb deqa niŋgi moreŋesoqneb. Niŋgi moio tamo buleb.

Ephesians 2

Iga moreŋesonam Qotei a iga qa are tulaŋ boleiyosiq qalaqalaigej. Deqa a na iga Kristus ombla ŋambile egej

1 Nami niŋgi une yoqnsib laqneb deqa niŋgi moreŋesoqneb. Niŋgi moio tamo buleb. 2 Bati deqa niŋgi mandam qa kumbra uge uge na walweloqneb. Niŋgi mondor uge uge laŋ goge di unub qaji naŋgo gate koba Satan aqa kumbra dauryoqneb. Satan a mondor uge siŋgila koba deqa a tamo naŋgi Qotei aqa anjam gotraŋyeqnub qaji naŋgo are miligiq di siŋgila na waueqnu. 3 Nami iga kalil dego tamo naŋgi di koba na laqnem deqa iga gago areqalo namij dauryoqnem. Iga gago jejamu qa areqalo uge uge dauryosim laqnem deqa Qotei aqa minjiŋ tamo uge uge naŋgoq di unu qaji di gagoq di dego soqnej.

4 Bole, iga une yoqnsim laqnem deqa iga moreŋesoqnem. Iga moio tamo bulem. Ariya bati deqa Qotei a iga qa are tulaŋ boleiyosiq qalaqalaigej deqa a na iga Kristus ombla ŋambile egej. A iga qa are boleiyej aqa kumbra dena qujai a na iga eleŋej. 6 Osiqa iga Kristus Yesus ombla na olo subq na tigeltgobulosiqa iga laŋ qureq joqsi oqsiqa Kristus aqa awo jaram kobaq di awotgej. 7 Kristus Yesus aqa wau na Qotei na kumbra boledamu di iga egej. Di kiyaqa? A iga qa are tulaŋ boleiyej aqa kumbra di a na tamo kalil bunu bunu brantoqnqab qaji naŋgi osornjrqajqa deqa. 8 Niŋgi Kristus qa nuŋgo areqalo siŋgilatonabqa Qotei a niŋgi qa are boleiyej aqa kumbra dena a na niŋgi eleŋosiq ŋambile eŋgej. Kumbra di niŋgi segi na yosai. Qotei a na niŋgi laŋa eŋgej. 9 Niŋgi wau bei yonab dena Qotei na niŋgi eleŋosai. Deqa tamo bei na aqa segi ñam soqtqa keresai. 10 Kristus Yesus aqa wau na Qotei na iga tamo uŋgasari bunuj gereigosiqa ŋambile egej. Di kiyaqa? Kumbra bole qa gam a na nami iga gereiyetgej qaji di iga dauryosim walweloqnqajqa deqa.

Nami Juda ti sawa bei bei qaji naŋgi ti jeu sonabqa Kristus a moisiq dena jeu kobotej

11 Niŋgi Juda tamo naŋgo kumbra qalie. Naŋgi na tamo naŋgi muluŋ breinjreqnub. Deqa naŋgi niŋgi merŋgeqnub, “Niŋgi muluŋ aiosai qaji tamo.” Naŋgi naŋgo segi baŋ na tamo naŋgi muluŋ breinjreqnub. Ariya niŋgi geregere are qaliye. Nami niŋgi sawa bei bei qaji tamo sonabqa 12 bati deqa niŋgi Kristus aqaq di sosai. Niŋgi isaq di soqneb. Niŋgi Israel tamo uŋgasari naŋgi ti sosai dego. Qotei na Israel naŋgi iŋgi bole bole enjrqa minjrsiqa aqa anjam di siŋgilatosiq soqnej. Ariya anjam di a na niŋgi merŋgosai. Deqa iŋgi bole bole mondoŋ brantqas qaji deqa niŋgi tariŋosaioqneb. Niŋgi mandamq endia laŋa Qotei qaliesai soqneb. 13 Nami niŋgi isaq di soqneb. Ariya Kristus a niŋgi qa moisiq aqa leŋ aiej dena niŋgi joqsiqa Qotei aqa areq bej. Deqa bini niŋgi Kristus Yesus beteryesosibqa Qotei aqa jojomq di unub. 14 Kristus a segi na jeu kobotej deqa bini iga so bole unum. Nami Juda tamo naŋgi ti sawa bei bei qaji tamo naŋgi ti jeu soqneb. Deqa jeŋ a naŋgo ambleq di sosiqa naŋgi getentnjresoqnej. Ariya Kristus a moisiq dena jeŋ di waqtosiqa jeu kobotej. Osiqa Juda naŋgi ti sawa bei bei qaji naŋgi ti turtnjrsiqa sawa qujaiq di atej. 15 A moiej gam dena a na Moses aqa dal anjam kalil taqal atekritej. A degyej. Di kiyaqa? A na Juda tamo naŋgi ti sawa bei bei qaji tamo naŋgi ti turtnjrim naŋgi tamo bunuj qujaiosib sqajqa deqa. Kumbra dena a na jeu kobotosiqa iga lawo kumbraq di atej unum. 16 A na Juda naŋgi ti sawa bei bei qaji naŋgi ti turtnjrim naŋgi koba na tamo qujaiosib sqajqa deqa marsiq ŋamburbasq di moiej. Moisiq dena a jeu kobotej. 17 A bosiqa anjam bole endegsi palontoqnej, “Bini niŋgi are qujaitosib lawo kumbraq di unub.” A na anjam bole di niŋgi sawa isaq di unub qaji ti niŋgi jojomq di unub qaji ti palontosiq merŋgoqnej. 18 Kristus aqa wau na iga koba na Mondor qujai ejunum. Deqa iga are qujaitosim unum. Mondor dena gam waqtetgej deqa iga gaigai gago Abu Qotei aqa ulatamuq di brantoqnqom.

Kristen tamo naŋgi Qotei aqa tal bul unub

19 Deqa bini niŋgi olo yauŋ tamo sosai. Niŋgi Qotei aqa segi tamo uŋgasari naŋgi koba na unub. Niŋgi Qotei aqa tamo tiŋtiŋ unub. 20 Niŋgi Qotei aqa tal bul unub. Qotei a segi na tal di gereiyej. Qotei aqa anjam maro tamo naŋgi ti aqa medabu o qaji tamo naŋgi ti tal aqa ai bul tigelejunub. Qotei a segi na tal di tigeltej unu. Kristus Yesus a segi tal aqa ai tuma qaji. A segi na tal di siŋgilatejunu. 21 Tal di aqa tanu kalil naŋgi Kristus beteryejunub deqa naŋgi kalil koba na siŋgila na tigelejunub. Qotei a na tal di gereiyoqnsiq unu. Deqa tal di kobaqujaoqnsiqa Tamo Koba Qotei aqa segi tal bul tigelejunu. 22 Niŋgi dego Kristus beteryejunub deqa Qotei na niŋgi ti aqa segi tamo uŋgasari naŋgi ti koroiŋgej unub. Deqa niŋgi aqa segi tal bole unub. Qotei naŋgi aqa Mondor Bole wo naŋgi aiyel tal miligiq di sqajqa osiq tal di gereiyej.